Lezon sortu zen 1969an, eta Euskal Filologian lizentziatu Deustuko Unibertsitatean. Oroitzene AEK euskaltegiaren sortzaileetakoa izan zen, bertako Orratx! kultur elkartearen eta Orratx! aldizkariaren sortzaile, baita Oarso Telebistarena ere. Oarsoaldeko Hitzaren sorreran parte hartu zuen, era berean.
2021eko urtarrilean Maiatz argitaletxeak argitara ateratako Heriori ebatsitako poemak du haren lehen olerki liburua, Lander Zurutuza liburuzainaren marrazkiez osatua. Euskara ardatz duen zenbaki honek ezin haren poema faltarik eduki bere baitan, izan ere, Urtzi Urkizuk dioen gisan «zoragarria da olerkariak euskarari muzin egiten dioten “sasi-abertzaleei” egiten dien kritika». Gozatu lagin honetaz, eta irakurri liburua, heriori deiadar eginda, bizitza aldarrikatuko du eta.
| EUSKALDUN TXARRAREN BALADA Euskaldun txarra,euskaldun putakumea; burugabe errukarria. Hire herriaz beste egin duan, dunan simaur-pila malapartatua! Hurko euskaldunarekin erdaretan mintzo haizena, zuri alaena! Faltsu eta saldua! Hire herriaz beste egin duan, dunan simaur-pila malapartatua! Besteri egozten diok eta dion hire mihian eta barne-muinean den errua. Hire herriaz beste egin duan, dunan simaur-pila malapartatua! Hiri inork ez din, ez dik eragozten euskaldunarekin euskaraz solastatzen, hire harrokeria ustelak ez bada. Hire herriaz beste egin duan, dunan simaur-pila malapartatua! Erosokerian eta eroskerian bizi haiz nire begietara. Mespretxatzen haut, hik “heure” hizkuntza baino areago! Hire herriaz beste egin duan, dunan simaur-pila malapartatua! Uko egin dion, diok hire odolari, hire izateari eta ez haizenean bizi haiz, hilda bizi haiz. Ez haiz inor! Hire herriaz beste egin duan, dunan simaur-pila malapartatua! | ALGARETAN ERDARETAN Kezkarik gabe,mintza zaitezte erdaretan, euskal herrietako euskaradun bihotz eta burugabeak, hiltzera doan herriaren ohoretan! Mintza zaitezte algaretan, hizkera arrotzetan, izan gaitezen arrotz geure habietan, arranoak beretzat hartutako tokietan, odola sendi dezagun arte gure lokietan, lehertu beharrean buruko hodietan, deserria herrian ereiten dugun bitartean, galduko gara izan nahi eta ezinaren hutsartean, nor garen ere ez dugu jakinen artean. |
Utzi erantzuna